– Det er eit stort publikum og ein flott arena for å løfta fram denne historia, seier Sara Wilhelmsen.
Saman med kunstnaren Liv Dysthe Sønderland er dei tatt med i Høstustillingen, med eit stykke basert på Svanviken arbeidskoloni, kalla "Du visker meg ikke ut".
– Korleis føles det å bli tatt med i noko slikt?
– Kjempestas!
Sara Wilhelmsen er skodespelarstudent og har tidlegare arbeidd fleire år som frilansar. Ho har lagt ned mangfoldige timar for å bevara og formidla kulturarva, gjennom både skodespel og utstillingar.
– Eg hadde ikkje halde ut viss det ikkje var viktig for meg.
Svanviken
I sjølve stykket teiknar dei opp eit rom med krittmaskin, basert på planteikningane til Svanviken. Dei har gjentatt det fleire gongar, i allslags vær.
– Strekane blir viska vekk av været, men gjentakinga er ei insistering på at me framleis vil fortelja historia.
Stykket finnest i både videoformat, og som ei framsyning. De kan sjå videoen nedst i saka.
– I framsyninga gjer me litt forskjellig. Me har blant anna lese opningstalen til Jacob Walnum frå då han opna Svanviken arbeidskoloni.
Ein slags milepæl?
Dei har hatt framsyninga på torget i både Molde, Kristiansund og nå nylegast - Oslo, i sjølve Slottsparken.
– Korleis fekk de det til?
– Det er jo eit godt prosjekt, og eg vil tru søknaden frå Høstustillingen til Slottet var god.
Så vidt Sara veit har det ikkje vore utstillingar i Slottsparken før.
– Det har vore søkt før, men dei har fått avslag. Derfor føles det ganske svært at me no får lov å framføra stykke vårt her.
I samband med utstillinga sette dei opp ein plakett med informasjon om Svanviken og historia.
– Det er viktig å få folk til å opna augo for denne delen av historia, seier ho og peiker til Eilert Sundt-debatten som eit nyleg eksempel på at det er behov for folkeopplysing.
