Namnet på debutplata, «Ukjint vandrar», er inga tilfeldigheit. For når Vidar Karlsen Kolbu trår inn i tatermusikken si verd, er den erfarne musikaren plutseleg på bar bakke.
– Det er tre-fire kjemper som har hatt miljøet for seg sjølv, og så kjem eg no som ein slags underdog – ein ukjent vandrar.
Vidar har lang fartstid i det populære bygderockbandet Spelloppmaker, men då han skulle laga sitt første soloalbum, valde han altså taterviser.
– Det er viktig å minna folk på desse visene, elles blir dei borte, seier han om sjangerbyte og legg til:
– Eg er frå taterslekt sjølv, og har alltid vore fascinert av musikken der. No bestemte eg og bror min oss for å gjera ein innsats for å formidla musikken vidare.
– Vil aldri bli pop
Dei utvalde visene er blant anna gamle slagerar som «Fant-Sonja» og «Se min ild», men med ein vri. Vidar har nemleg modernisert dei – men ikkje for mykje.
– Det vil aldri bli pop, forsikrar han.
Men noko meir kommersielt har det blitt.
Ifølgje Vidar har taterviser tradisjonelt bore preg av å vera «stevete». Takt har vore mindre viktig og vokalen noko meir flytande.
No gir han songane nytt liv i countrydrakt.
– Det er rett og slett fordi det er den sjangeren eg er komfortabel med, seier Vidar og legg til at sjangeren passar dei gamle tekstane godt.
Årsaka til at akkurat desse visene har fått nytt liv som countrysongar er enkel:
– Det er dei eg likar best av dei som er kjende.
Då han hadde valt ut songane, handla det om å finna seg sjølv i dei. Difor er alle songane omsette til tjukk solung-dialekt.
– Det har vore viktig for meg å synga på solung. Dialekta er godt eigna til song.
«Ukjent vandrar» er forresten «ukjint vandrer» på solung.
Respons og framtid
Ifølgje Vidar har responsen vore veldig bra så langt.
– Det var litt skummelt å røra den delen av arva mi, men det ser heldigvis ut som det slår han, seier Vidar. Han er godt nøgde med mange fine og positive tilbakemeldingar.
– Kjem det meir?
– Ja, seier Vidar bestemt på spørsmålet.
Sjølv om debutplata er rykande fersk, har han klart for seg kva neste prosjekt skal innehalda.
– Me vil leita fram dei meir ukjente songane, dei som ikkje er å finna på opptak no.
Dei har allereie prata med folk i både aust og vest som har tekstar liggande.
Men først må turnésommaren med Spelloppmaker gjerast unna. Deretter har han allereie fått fleire førespurnader om å framføra «Ukjint Vandrer». Nøyaktig kor og kor tid vil han ikkje avsløra heilt enno.
De kan høyra på plata her:
